Կատեգորիա Խոհանոց (Շիրակի ԳԱՄԿ)
Ըստ Շիրակի ԳԱՄկ

Թթուներ և մարինադներ


ՊԱՀԱԾՈ  ՎԱՐՈՒՆԳ

Ընտրում են թարմ, կանաչ, անվնաս,  չհասունացած  մանր վարունգներ:  Վարունգից հեռացնում են ծաղկի մնացորդը և պտղակոթը, ապա 2-3  ժամ պահում սառը ջրի մեջ,  որից  հետո լավ լվանում են  և դասավորում  բանկաների կամ բալոնների  մեջ: Միաժամանակ պատրաստում են օժանդակ նյութերը` քյարավուզ, սամիթ, հոտավետ և սև պղպեղ,  դափնու տերև,  սխտոր: Դրանք  մաքրում են, լվանում,  կտրտում,  որից հետո համեմունքների 50 %-ը  լցնում  են տարայի  մեջ նախքան  վարունգը  դասավորելը,  իսկ  50 %-ը` վարունգը  դասավորելուց հետո: Յուրաքանչյուր  բանկայի մեջ ավելացնում են նաև երկու կանաչ պղպեղ (ծիծակ):   Այս բոլոր աշխատանքները կատարելուց հետո  յուրաքանչյուր 3 լիտրանոց  անոթին  ավելացնում են 2  ճաշի գդալ  աղ, 1  ճաշի գդալ շաքարավազ և եռացրած  ջուր, ապա` մանրէազերծում են 15-20 րոպե:  Փակելուց  առաջ  ավելացնում են 1  ճաշի գդալ 80%-անոց էսենցիա (քացախաթթու):  

ՊԱՀԱԾՈ ՎԱՐՈՒՆԳ ԵՎ ԼՈԼԻԿ 

 Ընտրում են  փոքր, թարմ,  անվնաս, պինդ, միատեսակ  կարմիր և կանաչ լոլիկ ու վարունգ:  Վարունգը 3-4  ժամ պահում են սառը ջրում:  Համեմունքների 50 %-ը լցնում են  տարայի մեջ,  ապա շարում են  մի շարք լոլիկ,  մի շարք վարունգ այնքան,  որ տարան ամբողջապես լցվի,  հետո  համեմունքների  մնացած 50 տոկոսը:  Պատրաստում են  այնպես, ինչպես ՙՊահածո վարունգը՚:

ԿԱՆԱՉ ԵՎ ԿԱՐՄԻՐ ԼՈԼԻԿԻ ՄԱՐԻՆԱԴ

Ընտրում են  փոքր, անվնաս, ամուր  կարմիր կամ կանաչ լոլիկ և լավ լվանում: Այնուհետև ապակե անոթների  մեջ խիտ շարում են լոլիկը այնպես,  որ չվնասվի:  Պատրաստում են այնպես, ինչպես ՙՊահածո  վարունգը՚:

ԽԱՂՈՂԻ ՄԱՐԻՆԱԴ

Ընտրում են թարմ,  անվնաս խաղող, հեռացնում են  պտղակոթերը  և լցնում  ապակե անոթների մեջ: Պատրաստում են այնպես, ինչպես ՙպահածո վարունգը՚:    

ՏԱՆՁԻ  ՄԱՐԻՆԱԴ

Տանձի  մարինադ կարելի է  պատրաստել ինչպես կտրտած, այնպես էլ ամբողջական  տանձից: Հեռացնում են պտղակոթը, միջուկը, լավ լվանում են, իսկ չկտրտած տանձից հատուկ թիթեղյա խողովակով  հեռացնում են  միջուկը:  Նախապատրաստած պտուղները  խիտ դասավորում  են մաքուր ապակե անոթների մեջ:  Պատրաստում են այնպես, ինչպես ՙպահածո վարունգը՚:

  ԿԱՆԱՉ ԼՈԲՈՒ  ՄԱՐԻՆԱԴ 

 Թարմ կանաչ լոբու թելիկները հանում են, լվանում հոսող ջրով, 2-3 րոպե  խաշում եռման ջրում: Կարելի է լոբին թողնել ամբողջական  կամ կտրատել մոտ 3 սմ շերտերի: Դասավորելիս  անհրաժեշտ է լոբին լավ տեղավորել:  Յուրաքանչյուր 1 լիտրանոց անոթին ավելացնում են կանաչեղեն` 5 գրամ կտրտած մաղադանոս, 10գ սամիթ, 5 գ համեմ: Աղաջուրը` 1լ  ջրին` 70-80 գ աղ, 80-100 գ շաքարավազ:  Աղաջուրը լոբու վրա լցնելուց  հետո 20-25 րոպե մանրէազերծում են:  Փակելուց  առաջ ավելացնում են 1 ճաշի գդալ էսենցիա:  Այս պահածոն  կիսաֆաբրիկատ է:  Օգտագործելու համար բանկան բացում են,  միջի  ջուրը թափում, ավելացնում մաքուր ջուր  և պահում 5 ժամ: Ապա ջուրը  թափում են,  տապակում յուղով  և վրան ձու  կոտրում:  

ԿԱՂԱՄԲԻ ԹԹՈՒ

Կաղամբի թթուն լինում է երկու տեսակի` մանրացրած և ամբողջական կտորներով:

Մանրացրած կաղամբով թթու. կաղամբը մանր կտրտել, ինչպես բորշչի համար,  վրան աղ ցանել և թողնել 5-6  ժամ: Գազարը մանր կտրատել, քյարավուզը և սամիթը  փոքրիկ հանգույցներով  կապել, կաղամբի վրա  ցանել ծեծած  կարմիր պղպեղ և դափնետերև:  Այս բոլորը լցնել թթվի ամանի մեջ ու լավ սեղմել,  այնպես, որ ջուրը բարձրանա և թթուն ծածկի:  Այս  թթվի համար  պետք է ընտրել կաղամբի  պինդ գլուխներ: Լավ կլինի,  եթե  թթուն դրվի կարասի մեջ:  Նկատի պետք է  ունենալ, որ բոլոր թթուների համար էլ վճռական նշանակություն ունի տեղը, այն պետք է հով լինի,  բայց ոչ երբեք  ցուրտ: Թթուն չպետք է սառչի:   

Կաղամբի թթու ամբողջական կտորներով.  դնելիս կաղամբները պետք է մեջտեղից կիսել և զգուշությամբ  փորել հանել կոթը, փոքր կաղամբները կարելի է չկիսել, այլ միայն հանել կոթը:  Կաղամբի  հետ կարելի է  դնել նաև մի քիչ կանաչ տաքդեղ, ինչպես նաև փոքր  կապերով  քյարավուզ և սամիթ:  Աղաջուրը պետք է բռնել նոսր (10 լիտր ջրին` 0.5 կգ քարաղ)  և լցնել  այնքան, որ բարձրանա և ծածկի կաղամբը: Թթուն պետք է պահել հով տեղում:  Թթուն ձմռանը օգտագործում են տոլմա և  բորշչ եփելու  համար:  

ԲԱԴՐԻՋԱՆԻ ԹԹՈՒ

  Բադրիջանի թթուն դրվում է առանց կճպելու, իհարկե` կոթը և կանաչ մասերը  հեռացնելուց հետո:  1-2 րոպե  եռաջրում թողնելուց հետո  բադրիջանները հանում են, ջրքամում, մեջը մի քիչ փորում  և լցնում քերիչով անցկացրած գազարի, կտրտած մաղադանոսի  և սխտորի ֆարշ: Բադրիջանները կապում են մաղադանոսով  և վրան  լցնում  նոսր  աղաջուր:

Խ Ա Ռ Ը   Թ Թ ՈՒ

Գազարը մաքրել և մանրել (ինչպես ֆարշի համար ), մաքրել և կտրտել նաև քյարավուզը, մաղադանոսն ու սխտորը: Խոշոր, կարմիր տաքդեղները լվանալ, հեռացնել կոթն ու միջուկը: Բադրիջանների կոթերը նույնպես հեռացնել ու թողնել առանց կճպելու: Երկարությամբ ճեղքել և միջուկից մի քիչ հանել` ֆարշին տեղ անելու համար: Բադրիջանը առատ ձեթի մեջ թեթևակի տապակել:  Տաքդեղները  կարելի է դնել և տապակած,  և  առանց տապակելու:  Այս ամենից հետո պատրաստի  ֆարշը  լցնել բադրիջանների և  տաքդեղների մեջ ,  քյարավուզով կապել:  Այնուհետև  դասավորել ամանի մեջ` մի շերտ  բադրիջան,  մի շերտ տաքդեղ:  Յուրաքանչյուր շերտ  դնելիս  ձեռքով սեղմել և թեթև աղ անել:  Ամեն տեսակից պետք է  ստացվի մի քանի շերտ:  Վերջում  վրան  հարկավոր է լցնել այնքան  ձեթ ու քացախ,  որ ծածկի  (վերցնում են մի մաս քացախ,  երկու մաս ձեթ):  Զանգվածի  վրա քար են  դնում, որպեսզի թթվելիս չբարձրանա և  միշտ ծածկված լինի երկու մատ հաստությամբ  ձեթի շերտով:

Դոշաբներ>>

Մսի վերամշակում>>

Կաթի վերամշակում>>

Թթուներ և մարինադներ>>

Չրերի պատրաստում>>

Կոմպոտներ>>

Ջեմեր և պովիդլոներ>>

Մուրաբաներ>>

Հայկական տորթեր>>


To top